Umucamanza wo mu rukiko rwa Los Angeles County muri Leta Zunze Ubumwe za Amerika, Maria Cavalluzzi, ku wa Kabiri tariki 29 Nzeri 2026, yemeje ko urubanza rwa Ortiz rushobora gukomeza nyuma y'uko yari amaze igihe akorerwa isuzuma ry'imitekerereze. Ortiz, ukomoka muri Orlando muri Leta ya Florida, aregwa kugerageza kwica Rihanna ndetse n'ibindi byaha birenga 12 bikomeye bifitanye isano n'iraswa ryabereye hafi y'urugo rw'uyu muhanzikazi muri Werurwe 2026.
Uyu mugore akaba ahakana ibyaha byose aregwa, ndetse akaba yarabwiye urukiko ko ari umwere. Mu iburanisha rigufi ryabaye ku wa Kabiri, Umucamanza Cavalluzzi yatangaje ko inzira y'urubanza mu byaha aregwa yongeye gusubukurwa nyuma y'amezi yari amaze akorerwa isuzuma ry'imitekerereze. Ortiz yagaragaye mu rukiko yambaye imyenda y'abagororwa y'umuhondo, ari mu mapingu kandi ari inyuma y'ikirahure ahari imfungwa.
Nta jambo yavuze muri iryo buranisha. Ibisobanuro birambuye ku byavuye mu isuzuma ry'imitekerereze ye ntibyatangajwe mu rukiko, kuko inyandiko zirimo ayo makuru zagizwe ibanga. Urubanza rwa Ortiz rwari rwarahagaritswe, mu gihe hakorwaga isuzuma ry'ubushobozi bwe bwo kuburana. Ubu yongeye gusubizwa mu mategeko, ndetse ategetswe kongera kwitaba urukiko ku wa Gatatu.
Abashinjacyaha n'abapolisi bavuga ko ku wa 8 Werurwe 2026, Ortiz yageze hafi y'aho Rihanna na A$AP Rocky batuye mu gace ka Beverly Crest, hafi ya Beverly Hills, atwaye imodoka yo mu bwoko bwa Tesla. Bavuga ko yahise akoresha imbunda yo mu bwoko bwa AR-15, arasa nibura amasasu 20 yerekeza ku mutungo w'aba bahanzi ndetse no ku nzu yari hafi aho.
Nta muntu wakomeretse muri icyo gikorwa. Amasasu kandi yageze ku rukuta rwo hanze rw'icyumba cy'abana kiri ku igorofa rya kabiri ry'inzu. Icyo gihe abana batatu ba Rihanna na A$AP Rocky bari muri icyo cyumba bari kumwe n'umurezi wabo. Ortiz kandi aregwa ibyaha 10 byo gutera umuntu akoresheje imbunda yica, buri cyaha kikaba gifitanye isano n'abantu bari muri izo nzu zombi, ndetse n'ibindi byaha bitatu byo kurasa ku modoka cyangwa ku nzu yari irimo abantu.
Abashinzwe iperereza bavuga ko nyuma yo gufatwa uwo munsi, Ortiz yavuze ko atari agamije kwica. Kugeza ubu, abashinzwe umutekano n'abashinjacyaha ntibaratangaza impamvu yaba yaratumye Ortiz arasa ku rugo rwa Rihanna na A$AP Rocky. Ntabwo kandi higeze hatangazwa isano izwi hagati ya Ortiz na Rihanna. Mbere y'iki kibazo, Ortiz nta mateka y'ibyaha yari afite nk'uko bibitangaje.
Amakuru rusange agaragaza ko yari amaze imyaka irenga 10 akora nk'umuvuzi wita ku bantu bafite ibibazo bijyanye no kuvuga. Naramuka ahamwe n'ibyaha byose aregwa, Ortiz ashobora guhanishwa igifungo cya burundu.
Key points
- Ortiz aregwa kugerageza kwica Rihanna ndetse n'ibindi byaha birenga 12 bikomeye bifitanye isano n'iraswa ryabereye hafi y'urugo rw'uyu muhanzikazi muri Werurwe 2026.
- Urubanza rwa Ortiz rwari rwarahagaritswe, mu gihe hakorwaga isuzuma ry'ubushobozi bwe bwo kuburana.
- Naramuka ahamwe n'ibyaha byose aregwa, Ortiz ashobora guhanishwa igifungo cya burundu.
