Die Suid-Afrikaanse Postbank het sy finansiële posisie en oudituitkomste verbeter, maar dalende rente-inkomste, ’n hoë koste-inkomste-verhouding en die behoefte aan miljarde rande se bykomende kapitaal bly struikelblokke. Die bank het sy totale bates tot R10 miljard en kliënte-deposito’s tot R9,45 miljard verhoog gedurende die 2025-’26 boekjaar.
Die bank se balansstaat, likiditeit, bestuur en regulatoriese stand het verbeter en is daar afgesluit met R9,45 miljard in deposito’s van kliënte. Die bank het sy jaareinde-verslag bekend gemaak en gesê sy netto rente-inkomste van R690,8 miljoen in die vorige boekjaar het na R646,9 miljoen gedaal. Volgens die bank kan dié afname hoofsaaklik toegeskryf word aan minder as die begrote aantal deponeerders en ’n vroeër as verwagte daling in rentekoerse.
Die bank het in die boekjaar 79% van die teikens in sy jaarlikse prestasieplan gehaal, teenoor 44% in die 2024-’25 boekjaar. Postbank het ook vordering met verskeie kritieke programme gemaak om sy tegnologie te moderniseer, sy regulatoriese posisie te versterk en vir sy kommersiële ambisies op langer termyn voor te berei. Die bank se registrasie as ’n gelisensieerde finansiëlediensteverskaffer by die Gedragsowerheid vir die Finansiële Sektor was ook vanjaar suksesvol.
Die bank het ’n nie-rente-inkomste van R60,4 miljoen aangeteken, met ’n koste-inkomste verhouding van 103,8%. Hoewel dit aansienlik beter as die jaarteiken van 123% was, dui die verhouding daarop dat koste steeds hoog bly in verhouding tot inkomste. Volgens die bank is ’n netto verlies ná belasting van R5,2 miljoen vir die boekjaar aangemeld.
Postbank het ’n versoek vir R2,5 miljard by die nasionale tesourie ingedien. Hiervan is R500 miljoen vir kritieke kapitaal-infrastruktuur, stelsels en strategiese transformasie-inisiatiewe, en R2 miljard om regulatoriese kapitaal te versterk ter ondersteuning van sy kommersiële banklisensie en die kapitaalvereistes van die Suid-Afrikaanse Reserwebank.
Die bank het aan die einde van die jaar sowat R2,3 miljard in kontant en kontantekwivalente gehad. Sy likiditeitsdekkingverhouding was 156% en sy netto stabiele befondsingsverhouding 154%. Netto ekwiteite het egter van R549,9 miljoen na R429,6 miljoen afgeneem. ’n Belangrike aspek is nietemin dat die ouditeur-generaal ’n ongekwalifiseerde ouditmening met geen wysigings nie vir Postbank se boekjaar uitgereik het.
Postbank sê die volgehoue verbetering weerspieël vordering met finansiële verslagdoening, bestuur en interne beheermaatreëls. Die bank het voorheen ’n gekwalifiseerde mening ontvang, terwyl ernstiger oudituitkomste, waaronder ’n meningonthouding, in die tydperk voor 2023 voorgekom het.
Key points
- Die Suid-Afrikaanse Postbank het sy totale bates tot R10 miljard en kliënte-deposito’s tot R9,45 miljard verhoog gedurende die 2025-’26 boekjaar.
- Die bank se netto rente-inkomste het van R690,8 miljoen na R646,9 miljoen gedaal.
- Postbank het ’n versoek vir R2,5 miljard by die nasionale tesourie ingedien.
