Joseph Ntawangundi, wahoze ari Umuyobozi wo hejuru mu Ishyaka FDU-Inkingi rya Victoire Ingabire, yemeye ku mugaragaro uruhare yagize muri Jenoside yakorewe Abatutsi mu 1994. Yavuze ko yicuza ibyaha yakoze, asaba imbabazi abarokotse kandi yemera ko yababariwe. Ntawangundi yabitangaje ku wa Gatatu, tariki ya 28 Ukwakira 2026, ubwo yatangaga ubuhamya mu Igororero rya Nyamasheke.
Ntawangundi yahamwe n'ibyaha byo kugira uruhare mu kwica abanyeshuri b'Abatutsi n'umwarimu wari mu nshingano ze. Ibyaha bya Ntawangundi yabikoreye ku Ishuri ry'Ubuhinzi n'Ubworozi rya EAV Gitwe, riherereye mu Murenge wa Rukira, mu Karere ka Ngoma. Yakatirwa igifungo cy'imyaka 17 nyuma yo kwemera uruhare rwe mu byaha bya Jenoside yakorewe Abatutsi.
Izina rya Joseph Ntawangundi ryamenyekanye cyane mu 2010, ubwo yari umufasha wa Victoire Ingabire, wari wagarutse mu Rwanda agamije kwiyamamariza kuyobora Igihugu. Ntawangundi yagarutse mu Rwanda ari kumwe na Ingabire ku wa 16 Mutarama 2010, ariko nyuma y'igihe kitageze ku kwezi arafatwa, kuko yari akurikiranyweho ibyaha bya Jenoside yari yarasabiwe n'inkiko Gacaca.
Ingabire yahise yamagana ifatwa rye, ahakana ko Ntawangundi yaba yaragize uruhare muri Jenoside, avuga ko atari mu Rwanda mu 1994. Mu itangazo ryashyizwe ahagaragara icyo gihe, Ingabire yavuze ko Ntawangundi atigeze akora mu rwego rw'uburezi, bityo ko atigeze aba Umuyobozi w'Ishuri rya EAV Gitwe yashinjwaga gukoreraho ibyaha.
Nyuma yaje kwemera ibyaha, asaba imbabazi, akatirwa igifungo cy'imyaka 17. Yemeye ko yakomeje kwifatanya n'imitwe irwanya u Rwanda nyuma ya Jenoside. Mu buhamya bwe, Ntawangundi yanagarutse ku buzima bwe nyuma ya Jenoside, avuga ko amaze guhunga u Rwanda yagiye mu bikorwa by'imitwe yari igamije guhungabanya umutekano w'Igihugu.
Ntawangundi yavuze ko yafashwe ku wa 8 Gashyantare 2010, nyuma y'aho ku wa 24 Werurwe 2010, imbere y'Urukiko Gacaca rw'Umurenge wa Rukira, yiyemeje kutazongera kwifatanya n'abantu bafite ingengabitekerezo z'ubutagondwa. Yiyemeje kuba umusemburo w'impinduka, avuga ko igihe yamaze muri gereza n'inyigisho yahawe muri gahunda yo kwitegura gusubira mu muryango byamufashije guhindura imyumvire n'imyitwarire.
Ubuhamya bwa Ntawangundi bushimangira ko kwemera uruhare umuntu yagize muri Jenoside, kuvugisha ukuri ku mateka ye no gusaba imbabazi ari bimwe mu ntambwe z'ingenzi mu rugendo rwo guhinduka no kongera kubana n'abo yahemukiye. Yanijeje ko igihe cyose yaba amenye amakuru ku bantu bashobora guhungabanya umutekano w'igihugu, azajya ayageza ku nzego zibishinzwe.
Key points
- Joseph Ntawangundi yemeye uruhare rwe muri Jenoside yakorewe Abatutsi mu 1994.
- Ntawangundi asaba imbabazi abarokotse Jenoside.
- Ubuhamya bwa Ntawangundi bushimangira kwemera uruhare, kuvugisha ukuri, no gusaba imbabazi.
